Marrëveshja për zhbllokimin e drithërave nga Ukraina e nënshkruar në Istanbul është “arritje historike e diplomacisë turke”, tha zëdhënësi i presidentit turk
Türkiye është e gatshme të ofrojë mbështetje në përpjekjet e vazhdueshme të Ukrainës për të çminuar ujërat përreth porteve të saj në Detin e Zi, duke shtuar ndihmën për të rifilluar eksportet e drithit ukrainas, tha zëdhënësi presidencial turk İbrahim Kalın, transmeton Anadolu Agency (AA).
“Nëse është e nevojshme, çminimi mund të sigurohet nga një vend i tretë. Türkiye është e gatshme të ofrojë ndihmën e saj” tha Kalın për kanalin turk të lajmeve NTV, pasi në Istanbul u nënshkrua marrëveshja për zhbllokimin e eksporteve të drithërave të Ukrainës në Detin e Zi.
“Si rezultat i negociatave diplomatike që kemi zhvilluar prej javësh, ky sukses historik u arrit sot”, tha ai, duke e quajtur marrëveshjen një “arritje historike të diplomacisë turke”.
Kalın vuri në dukje natyrën historike të marrëveshjes, duke thënë se ishte hera e parë që nga fillimi i luftës Rusi-Ukrainë më 24 shkurt që palët ranë dakord për një çështje dhe miratuan fillimin e një operacioni duke nënshkruar dy marrëveshje të ndryshme.
Nënshkrimi i Türkiye-s është gjithashtu në marrëveshje, theksoi Kalın.
“Presidenti turk Recep Tayyip Erdoğan e ndoqi procesin nga fillimi. Marrëveshja do të vendosë një themel besimi. Takimet e mbajtura nga Erdoğan hapën rrugën që palët të arrijnë në një përfundim”, shtoi ai.
Duke nënvizuar se dërgesat mund të fillojnë në ditët në vijim, Kalın tha se tre korridore kryesore janë përcaktuar në marrëveshje.
“Dërgesat e grurit nuk janë shqetësimi ynë i vetëm, (pasi) njerëzit po vdesin. Qëllimi ynë është të ndalojmë luftën”, tha ai.
Me ndërmjetësimin e Türkiye-s dhe OKB-së dhe praninë e presidentit Erdoğan dhe Sekretarit të Përgjithshëm Antonio Guterres, Ukraina dhe Rusia nënshkruan një marrëveshje në Istanbul për rifillimin e dërgesave të grurit të Ukrainës nga portet e Detit të Zi.
Sipas marrëveshjes, e arritur mbi një plan të udhëhequr nga OKB-ja gjatë bisedimeve të 13 korrikut në Istanbul, do të krijohet një qendër koordinimi për të kryer inspektime të përbashkëta në hyrje dhe dalje të porteve dhe për të garantuar sigurinë e rrugëve.
E vlerësuar ndërkombëtarisht për rolin e saj ndërmjetësues, Türkiye është koordinuar me Moskën dhe Kievin për të hapur një korridor nga qyteti port ukrainas i Odesës për të rifilluar dërgesat globale të drithërave që janë bllokuar për shkak të luftës Rusi-Ukrainë.
Këtë mars, Türkiye priti një takim midis ministrave të jashtëm rus dhe ukrainas në qytetin mesdhetar Antalya si pjesë e rolit të saj kyç në ndërmjetësimin midis palëve ndërluftuese.
