Ministri i Punëve të Brendshme të Türkiye-s, Süleyman Soylu, tha se zyrtarët bullgarë dorëzuan Hazni Golgen, i cili ndihmoi të dyshuarin e arratisur Bilal Hassan të largohej nga vendi pas sulmit terrorist
Ministri i Punëve të Brendshme të Türkiye-s, Süleyman Soylu, tha se një i dyshuar i përfshirë në sulmin vdekjeprurës terrorist të 13 nëntorit në Istanbul iu dorëzua autoriteteve turke, transmeton Anadolu Agency (AA).
Duke folur në një intervistë televizive, ministri Soylu tha se zyrtarët bullgarë dorëzuan Hazni Golgen, i cili ndihmoi të dyshuarin e arratisur Bilal Hassan të largohej nga vendi pas sulmit terrorist. Siç theksoi Soylu, dorëzimi është bërë në kufirin midis dy vendeve pasi autoritetet turke përcaktuan se ai ndodhej në Bullgari.
“Ne diskutuam çështjen me autoritetet në Bullgari. Ata na e dorëzuan atë (Golgen) në Edirne. Falënderojmë Bullgarinë për bashkëpunimin”, tha Soylu.
Në ditën e shpërthimit të bombës, Hassan e kishte sjellë autorin e sulmit që vrau gjashtë persona dhe la 81 të plagosur në rrugën Istiklal të Istanbul-it.
Hetimi i Zyrës së Kryeprokurorit Publik të Istanbul-it për sulmin terrorist është në vazhdim, ku gjithsej 59 të dyshuar janë marrë në paraburgim, 24 prej të cilëve janë arrestuar si pjesë e hetimeve.
Soylu kishte njoftuar më parë se vëllai i Hassan-it ishte kapur gjithashtu nga forcat e sigurisë.
