Orkun Gürer nga qyteti Çankırı i Türkiyes, vazhdon mjeshtërinë e akullores në këtë qytet me recetat që i solli gjyshi nga Maqedonia e Veriut para rreth gjysmë shekulli.
Orkun Gürer, një i ri 28-vjeçar nga qyteti Çankırı i Türkiyes, vazhdon traditën e përgatitjes së akullores në këtë qytet me recetat që i solli gjyshi nga Maqedonia e Veriut para rreth gjysmë shekulli.
Raşit Şengöz, gjyshi i Gürer, i cili ka qenë mjeshtër i akullores në Maqedoni të Veriut dhe i cili ka migruar në Türkiye në vitet 1980, siguronte jetesën duke bërë dhe shitur akullore në qytete të ndryshme të Türkiyes.
Së fundmi gjyshi i tij hapi një shitore të akullores në Çankırı në vitin 1994, ku deri në vitin 2017 së bashku me vajzën e tij vazhduan prodhimin e akullores.
Duke mësuar bërjen e akullores nga gjyshi i tij, Orkun Gürer, themeloi biznesin e tij në vitin 2019.
Ai e përgatit akulloren me salep natyral dhe qumësht si pjesëtar i brezit të tretë të prodhuesve të akullores në familjen e tyre.
Në një deklaratë për Anadolu, Gürer tha se që nga fëmijëria është brenda procesit të prodhimit të akullores.
“Unë e vazhdoj këtë profesion që e kam trashëguar nga gjyshi si brezi i tretë. Një akullore e vërtetë përbëhet nga tre përbërës kryesorë. Qumësht, salep dhe sheqer. I blejmë farat e salepit që rriten në mal dhe i bluajmë vetë në mulli. Qumështi ynë vjen i freskët çdo ditë nga fermat. Për sheqer përdorim sheqer kristal dhe nuk përdorim asnjë ngjyrues, glukozë apo gluten”, u shpreh ai.
Ai më tej shpjegoi se prodhojnë rreth 28 lloje të akulloreve. “Akulloret me fruta i prodhojmë nga fruta natyrale. Për shembull, manat e zeza i blejmë nga banorët e fshatit kur është sezoni dhe i ngrijmë. Si në çdo profesion, edhe në profesionin tonë hasim në vështirësi. Edhe pse akullorja mund të duket si një produkt i lehtë nga jashtë, qumështi, salepi dhe frutat e saj janë punë intensive. Me pak fjalë, bërja e akullores është një zanat”, theksoi Gürer.
Duke theksuar se u qëndroi besnik recetave që mësoi nga gjyshi i tij, por edhe i avancoi disa nga recetat, Gürer vuri në dukje se disa sekrete si koha e zierjes së qumështit, koha që i duhet qumështit për të bashkuar përbërësit e tjerë dhe përqindja e yndyrës së qumështit luajnë një rol të rëndësishëm në prodhimin e akullores.
