Alim Rama, përfaqësues i Lëvizjes Vetëvendosje (LVV), në Komisionin Qendror të Zgjedhjeve (KQZ), ditë më parë u zgjodh sekretarë organizativ në këtë subjekt politik, shkruan Gazeta Metro.
E kjo u pa si problematike, pasi që neni 61.8 pika (e) i Ligjit për Zgjedhje të Përgjithshme, do të i shkaktonte “problem” Ramës në lidhje me vazhdimin e qëndrimit të tij në KQZ.
Mirëpo, Alim Rama në një prononcim për
Gazetën Metro e sqaroi vet këtë situatë.Ai tha se mandati i tij nuk fillon tani, por në janar të vitit të ardhshëm dhe për këtë ai tha se do ti hapë rrugë zëvendësimit të tij në KQZ.
“Të gjitha këto shqetësime i kemi pasur parasysh dhe menduar. Mandati im si Sekretar Organizativ fillon në janar të vitit 2023 dhe deri atëherë jemi në fazën tranzicionale si përmbajtësore ashtu edhe formale. Kësisoj, unë do ta lirojë me kohë pozitën time në KQZ dhe aty do të bëhet zëvendësimi”, tha Rama me një përgjigje me shkrim.
Kujtojmë se të dielën e kaluar, Lëvizja Vetëvendosje zgjodhi organet e saja drejtuese, ku dhe Alim Rama u zgjodh sekretarë i kësaj partie për mandatin e ardhshëm./gazetametro.net