Gjyqtarët nën juridiksionin e UEFA-s në të ardhmen do të ndëshkojnë me penallti lojën me dorë si ajo që ndodhi në ndeshjen mes Gjermanisë dhe Spanjës (me rezultatin 1:1) në çerekfinalen e Kampionatit Evropian.
Anthony Taylor nuk dha penallti për Gjermaninë pas lojës me dorë të Marc Cucurella-s në kohën shtesë, kështu që Spanja kaloi në finale falë golit të Mikel Merino-s në minutën e 119-të të ndeshjes.
Gjermanët ishin të zemëruar me vendimin e arbitrit anglez, i cili nuk dha penallti, dhe as dhoma e VAR-it nuk ndërhyri, pasi u konsiderua se nuk kishte elementë për penallti. Megjithatë, në të ardhmen situata të tilla do të trajtohen ndryshe dhe në favor të ekipit që është në sulm.
Kështu ka vendosur komisioni gjyqtar i UEFA-s, i motivuar pikërisht nga situata e fundit në Kampionatin Evropian.
“Sipas udhëzimeve të fundit të UEFA-s, kontakti mes dorës dhe topit që ndalon një goditje drejt portës duhet të ndëshkohet më ashpër dhe në shumicën e rasteve të jepet penallti, përveç nëse dora e lojtarit mbrojtës është shumë afër trupit ose në kontakt me trupin. Në këtë rast, mbrojtësi (Cucurella) luan me dorë, e cila nuk është shumë afër trupit, duke ndaluar goditjen në portë dhe duke e bërë veten më të madh. Aty duhej të jepej penallti”, thuhet në dokumentin që u është dërguar të gjithë gjyqtarëve evropianë.
Shumëkush mendon se tani do të jetë edhe më e vështirë të vlerësohet se çfarë është penallti dhe çfarë jo, dhe ka gjasa që edhe vetë gjyqtarët të jenë të hutuar pas udhëzimit të ri të UEFA-s.
