Yjeve të Real Madridit u kanosej pezullimi për ndeshjen kundër Arsenalit në Ligën e Kampionëve, por nga kjo nuk do të ketë asgjë, pasi UEFA u tregua e butë dhe nuk i pezulloi lojtarët.
Kylian Mbappé, Antonio Rüdiger, Vinicius Jr. dhe Dani Ceballos festuan kalimin në çerekfinale ndaj Atletico Madridit me gjeste të diskutueshme – Mbappé preku pjesën intime, ndërsa Rüdiger bëri një gjest prerjeje në fyt me gishtin e madh.
Rüdiger ishte më i rrezikuari për pezullim, por në fund shpëtoi me “vetëm” një gjobë prej 40.000 eurosh, ndërsa Mbappé do të paguajë 30.000 euro. Ceballos u gjobit me 20.000 euro, ndërsa Vinicius nuk u ndëshkua fare.
Kështu, të gjithë lojtarët që morën pjesë në këtë festim të turpshëm do të kenë të drejtë të luajnë kundër Arsenalit, të cilit Reali do t’i shkojë mysafir të martën e ardhshme në ndeshjen e parë të çerekfinales së Ligës së Kampionëve.
Gjithashtu, mediat spanjolle raportojnë sot se portieri i Realit, Thibaut Courtois, pritet të jetë gati për përballjet me Arsenalin, pasi ka pasur probleme me lëndim së fundmi dhe ka munguar në ndeshjet ndaj Leganés në ligë dhe Sociedadit në Kupën e Mbretit.
