Numri i palestinezëve të ndaluar në Bregun Perëndimor të pushtuar dhe Kudsin Lindor që nga 7 tetori 2023 ka shkuar në 11.800
Ushtarët izraelitë arrestuan 29 palestinezë, duke përfshirë një fëmijë dhe një grua, gjatë bastisjeve në pjesë të ndryshme të Bregut Perëndimor të pushtuar, transmeton Anadolu.
Në një deklaratë të përbashkët të bërë nga Delegacioni i të Burgosurve dhe të Liruarve të Organizatës për Çlirimin e Palestinës (PLO) dhe Shoqatës së të Burgosurve Palestinezë, thuhet se ushtarët izraelitë vazhduan bastisjet e tyre në shtëpitë e palestinezëve në Bregun Perëndimor.
Në deklaratë thuhet se ushtria izraelite që nga mbrëmja e kaluar ka kryer bastisje në qytetet Qalqilya, Bethlehem, Jenin, Eriha (Jericho) dhe Khalil.
Njoftohet se ushtarët izraelitë gjatë bastisjeve kanë arrestuar gjithsej 29 persona, përfshirë ish-të arrestuar, një fëmijë dhe një grua.
Gjithashtu thuhet se gjatë bastisjeve, shtëpitë e palestinezëve u shkatërruan, dhe të arrestuarit dhe familjet e tyre iu nënshtruan rrahjeve dhe kërcënimeve.
Në deklaratë thuhet se numri i palestinezëve të ndaluar në Bregun Perëndimor të pushtuar dhe Kudsin Lindor që nga 7 tetori 2023 ka shkuar në 11.800.
Që nga 7 tetori 2023, kur Izraeli filloi sulmin e tij në Rripin e Gazës, ka pasur një rritje të ndalimeve, bastisjeve dhe sulmeve kundër palestinezëve në Bregun Perëndimor të pushtuar dhe Kudsin Lindor.
Sipas deklaratave të fundit të bëra nga autoritetet palestineze, 794 palestinezë, duke përfshirë 167 fëmijë, humbën jetën në sulmet e ushtarëve izraelitë dhe izraelitëve që uzurpuan tokat palestineze në Bregun Perëndimor dhe Kudsin Lindor që nga 7 tetori 2023.
