“Patrullimi përfaqëson një përpjekje të vazhdueshme që reflekton parimet e transparencës dhe paanshmërisë, duke ndihmuar në ruajtjen e stabilitetit dhe sigurisë në zonë, në përputhje me objektivat e misionit”, thuhet në njoftim.
Ushtarët kroatë të Komandës Rajonale Perëndim të misionit të NATO-s në Kosovë – KFOR, kanë zhvilluar patrullime në komunën e Prizrenit.
Siç njofton KFOR-i, patrullimi është një nga aktivitetet kryesore të ushtarëve të KFOR-it.
“Ai përfaqëson një përpjekje të vazhdueshme që reflekton parimet e transparencës dhe paanshmërisë, duke ndihmuar në ruajtjen e stabilitetit dhe sigurisë në zonë, në përputhje me objektivat e misionit”, thuhet në njoftim.
Vitin e kaluar Ministria e Mbrojtjes e Kroacisë njoftoi se dërgoi në kuadër të operacionit të KFOR-it edhe një kontingjent shtesë prej 150 trupash, me qëllim që të “mbështesë paqen në Republikën e Kosovës”.
KFOR-i në Kosovë vazhdon të zbatojë mandatin e tij – bazuar në Rezolutën 1244 të Këshillit të Sigurimit të OKB-së të vitit 1999 – për të kontribuuar në një mjedis të sigurt dhe të qetë për të gjithë njerëzit dhe komunitetet që jetojnë në Kosovë dhe për të garantuar lirinë e lëvizjes, në çdo kohë dhe në mënyrë të paanshme, duke bashkëpunuar ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë – EULEX, sipas roleve të tyre përkatëse si ofrues të sigurisë.
