Kryetari i Partisë Liberale Egjiptiane, Veton Berisha tha se nuk e di a do të votojë në seancën e nesërme, duke pohuar se deri më tani nuk kanë marrëveshje me Lëvizjen Vetëvendosje.
Ai tha se ka diskutime “të vazhdueshme” me LVV-në.
“Nesër është caktuar seanca plenare. Për momentin, nuk e di a do të votojë apo jo, sepse nuk kemi ndonjë propozim, i cili e dimë që do të vjen. Sigurisht që bazohemi dhe në personin dhe në marrëveshjen. Për momentin jemi ashtu siç kemi qenë… Kemi kontakte të vazhdueshme, po e diskutojmë dhe po i shohim mundësitë e një bashkëpunimi të mundshëm mes nesh. Nëse janë numrat kryhet, sepse është në mandatin e tij dhe ne e respektojmë Kushtetutën. Por s’ka marrëveshje ende”, tha Berisha.
I pyetur nëse do të bashkëpunojnë me opozitën, Berisha tha se nuk kanë problem me askënd.
“Ne jemi kolegë me secilin. Për dallim prej krejt të tjerëve ne nuk kemi problem me askënd. Problemi i vetëm është që kushdo që s’na respekton, s’do të respektohet, derisa ata që na respektojnë do t’i respektojmë. Asnjë pengesë, asnjë vijë të kuqe me askënd nuk e kemi”, shtoi ai.