Pasi ministri i Brendshëm i Serbisë, Aleksandar Vulin mori pjesë në një aksion në Suboticë me qëllim “shtypjen e krimeve dhe kundërvajtjeve të kryera nga emigrantët”, pati reagime të ashpra nga opozita, por edhe nga shoqata të ndryshme joqeveritare, madje edhe nga profesorët e fakulteteve.
Në videon që po përhapet në rrjetet sociale shihet trajtimi tejet çnjerëzor i emigrantëve.
Ata janë të gjunjëzuar në bar, duart i kanë në pjesën e pasme të kokës dhe rreth tyre patrullojnë një turmë policësh të armatosur dhe me uniformë, ndërsa kamerat regjistrojnë gjithçka. Gjatë asaj kohe Vulin bën një deklaratë për media, transmeton NovaS.
“Asnjë bandë kontrabande nuk do të kalojë pa u zbuluar dhe shkatërruar, pa u ndëshkuar në përputhje me ligjin anëtarët e tyre. Askush nuk mund të mbajë armë në Serbi, askush nuk mund të trafikojë njerëz në Serbi, Serbia nuk do të lejojë territorin e saj do të jetë një vend ku do të mblidhen banditët dhe llumrat e ndryshëm nga e gjithë Azia…”, ka deklaruar ndër të tjera ai.
Një koment pak më të ashpër ka bërë drejtori i Institutit për Çështje Evropiane, Naim Leo Beshiri, i cili e ka quajtur Vulin racist dhe nacionalist.
Një koment të ashpër ka bërë edhe Ivan Videnoviq, profesor i asociuar i Fakultetit të Fizikës të Universitetit të Beogradit, duke e krahasuar këtë trajtim të migrantëve me gjenocidin në Srebrenicë.
“Pse duhet të shikojmë ‘Quo vadis, Aida? kur mund ta realizojmë në kohë reale?”, ka shkruar ai.
