Virginia Giuffre, viktima e krimeve seksuale të financierit Jeffrey Epstein, e cila kishte pohuar se ishte abuzuar nga princi britanik Andrew kur ishte adoleshente, ka kryer vetëvrasje. Ajo ishte 41 vjeç.
“Me zemër të thyer njoftojmë se Virginia ndërroi jetë mbrëmë në fermën e saj në Australinë Perëndimore,” thuhet në deklaratën e familjes së saj.
Policia konfirmoi se shërbimet e urgjencës gjetën një grua pa ndjenja të premten në mbrëmje në shtëpinë e saj pranë Perthit në Australinë Perëndimore. Ajo u shpall e vdekur në vendin e ngjarjes pasi përpjekjet për reanimim dështuan.
Policia deklaroi se vdekja e saj nuk trajtohet si e dyshimtë.
“Ajo humbi jetën si pasojë e vetëvrasjes, pas një jete të kaluar si viktimë e abuzimit seksual dhe trafikimit për qëllime shfrytëzimi seksual. Virginia ishte një luftëtare e ashpër kundër abuzimit seksual dhe trafikimit të qenieve njerëzore. Ajo ishte një dritë që ngriti shumë të mbijetuar. Në fund, barra e abuzimit ishte aq e rëndë saqë për Virginian u bë e padurueshme,” tha familja e saj.
Giuffre, nënë e tre fëmijëve, ishte një nga akuzueset më të zëshme të Epstein-it, financierit të pasur dhe të fuqishëm. Në vitin 2019, ajo deklaroi publikisht se Epstein e kishte trafikuar dhe e kishte detyruar të kryente marrëdhënie seksuale me miqtë e tij, përfshirë princin Andrew, kur ajo ishte vetëm 17 vjeç.
Ajo gjithashtu kishte pohuar se princi Andrew ishte i vetëdijshëm për faktin që ajo ishte minorene në SHBA. Princ Andrew i ka mohuar vazhdimisht këto akuza.
Në korrik të vitit 2019, Epstein u akuzua për një pikë akuze për trafikim seksual të të miturve dhe një pikë tjetër për pjesëmarrje në trafikim seksual të të miturve, për të cilat ai u deklarua i pafajshëm. Një muaj më vonë, Epstein kreu vetëvrasje në burg.
Ai ishte akuzuar për drejtimin e një rrjeti trafikimi fëmijësh, duke rekrutuar vajza të moshës deri në 14 vjeç për seks dhe masazhe nudo në shtëpitë e tij në Nju Jork dhe Florida midis viteve 2002 dhe 2005.
Një marrëveshje kompromisi nga viti 2009, e hapur në vitin 2022, tregoi se Epstein i kishte paguar Giuffre 500.000 dollarë për të hequr dorë nga padia pa ndonjë pranim përgjegjësie apo faji.
Më herët, në vitin 2008, Epstein ishte deklaruar fajtor për akuzat shtetërore për prostitucion, përfshirë një rast me një vajzë 14-vjeçare, dhe kishte shërbyer 13 muaj burg bazuar në një marrëveshje shumë të diskutueshme të pranimit të fajësisë.
E dashura e dikurshme e Epstein-it, Ghislaine Maxwell, u arrestua në vitin 2020 dhe u akuzua për ndihmë në skemën e abuzimeve të Epstein-it. Në vitin 2021, një juri e shpalli fajtore për pesë akuza federale, përfshirë trafikimin e të miturve për shfrytëzim seksual dhe konspiracion. Një vit më vonë, ajo u dënua me 20 vjet burg.
