Presidenti i Serbisë, Aleksandar Vuçiç, mbajti një fjalim sonte në Banja Luka gjatë akademisë solemne me rastin e Sretenjes – Ditës së Pavarësisë së Serbisë, e cila këtë vit për herë të parë u shënua edhe në entitetin Republika Srpska.
Vuçiç falënderoi mikpritësit për pritjen dhe theksoi se kurrë nuk është ngurruar të thotë të vërtetën, edhe kur ajo nuk ishte e mirëpritur.
“Nuk jam turpëruar kurrë të them atë që mendoj. Nuk kam folur kurrë kundër të tjerëve, por gjithmonë kemi shtrirë dorën e pajtimit, edhe ndaj atyre që nuk donin ta pranonin,” tha Vuçiç.
“Ajo që u lejohet të tjerëve, neve nuk na lejohet”
Ai kritikoi veçanërisht atë që e quajti standarde të dyfishta në trajtimin e Serbisë dhe Republikës Srpska.
“Kur flasim për integritetin territorial, na akuzojnë vazhdimisht se Serbia kërcënon Bosnjë dhe Hercegovinën. Por kur themi se e respektojmë Bosnjën, kjo kurrë nuk është e mjaftueshme,” tha Vuçiç.
Ai konsideron se për Serbinë zbatohen kritere krejtësisht të ndryshme.
“Kur ulim kokën për viktimat e tyre, kur themi se na vjen keq, as atëherë nuk është e mjaftueshme. Thonë – nuk mjafton të ulni kokën, duhet të gjunjëzoheni, të jeni fajtorë për 100, 200 vjet,” theksoi Vuçiç, duke folur për atë që ai e quajti padrejtësi ndaj popullit serb.
Ai foli edhe për Rezolutën mbi Srebrenicën, të cilën e quajti një akt të imponuar pa konsultime me serbët.
“Ku keni parë që fqinjët e mirë të propozojnë rezoluta, ndërsa ata që preken nga to nuk pyeten fare? Kjo nuk është shenjë miqësie,” tha Vuçiç, duke shtuar se populli serb nuk është “as leckë e as një grusht tërshërë që dikush mund ta hajë” dhe se nuk do të lejojë poshtërimin.
“Nuk e dorëzojmë popullin tonë dhe vetëm këtë bëjmë – mbrojmë atë që është e jona,” theksoi Vuçiç.
“Nuk përzihemi në Bosnjë, por ju përditë në Serbi”
Duke folur për marrëdhëniet me Sarajevën, Vuçiç tha se Serbia e respekton Bosnjën dhe nuk ndërhyn në punët e saj të brendshme.
“Kur jemi përzier ne në qeverisjen tuaj në Sarajevë? E çfarë bëni ju? Çdo ditë përpiqeni të ndryshoni pushtetin në Beograd. Nuk jeni ju ata që do të vendosni për qeverinë në Beograd. Ju vetëm ndihmoni popullin tonë të marrë një vendim të mirë,” tha Vuçiç, duke akuzuar politikanët nga Sarajeva se përpiqen të destabilizojnë Serbinë.
Duke folur për lidhjen mes Serbisë dhe Republikës Srpska, Vuçiç theksoi se ajo është një lidhje e pathyeshme.
“Kur them se e dua Republikën Srpska, kjo nuk do të thotë se nuk e respektojmë Bosnjën. Por ne kemi të njëjtin emër dhe mbiemër – serb. Kemi të njëjtën gjuhë, të njëjtën alfabet dhe quhemi serbë. Nuk do të lejojmë askënd të na e marrë këtë,” tha Vuçiç.
Ai falënderoi posaçërisht Milorad Dodikun për mbështetjen, duke theksuar se shumë njerëz kanë kthyer shpinën kur ka qenë më e vështira.
“Faleminderit Dodikut që tregoi fytyrën e tij njerëzore, që nuk e ktheu shpinën kur ishte më e vështira, siç kanë bërë shumë në të kaluarën. Këtë nuk do ta harrojmë,” tha Vuçiç.
Presidenti serb shprehu shqetësimin e tij për procesin gjyqësor kundër Dodikut, duke e quajtur atë politikisht të motivuar.
“Jam i shqetësuar për situatën këtu, sepse e di që po zhvillohet një ndjekje penale dhe kam frikë se ata që i shërbejnë interesave të huaja do të marrin një vendim të keq dhe do ta përkeqësojnë edhe më shumë këtë përndjekje,” tha Vuçiç.
“Serbia nuk do t’i kthejë shpinën Republikës Srpska”
Vuçiç theksoi se “pavarësisht presioneve dhe faktorëve të jashtëm, Serbia do të mbetet pranë Republikës Srpska”.
Ai nënvizoi se Serbia do të vazhdojë të forcojë lidhjet me RS-në përmes projekteve infrastrukturore, rrugëve dhe hekurudhave.
“Do të vazhdojmë të lidhemi. Askush nuk mund t’u ndalojë serbëve të jenë së bashku dhe të bashkëpunojnë,” tha Vuçiç.
Në fund, ai foli përsëri për mesazhet që merr nga Sarajeva.
“Në Serbi kemi shumë boshnjakë dhe ata janë njerëz të mrekullueshëm. Nuk do të bëjmë kurrë asgjë kundër tyre, por nuk do të lejojmë as politikanët e tyre të poshtërojnë Serbinë dhe të na godasin si thes. Për çdo provokim, ne do të përgjigjemi duke mbrojtur emrin dhe krenarinë tonë serbe,” tha Vuçiç.
Kujtojmë se sonte në Banja Luka u mbajt akademia solemne me rastin e Sretenjes – Ditës së Pavarësisë së Serbisë, e cila tani në Republikën Srpska dëshirohet të festohet edhe si dita e tyre e shtetësisë në këtë entitet.
Në ceremoni mori pjesë një delegacion nga Serbia, i kryesuar nga Aleksandar Vuçiç.
Motoja e shënimit të Sretenjes është “Bashkim dhe Krenari”, me të cilën liderët politikë serbë në Bosnje dhe Hercegovinë dhe Serbi dëshirojnë të dërgojnë një mesazh të unitetit të popullit serb. Për këtë arsye, Sretenja këtë vit festohet për herë të parë si një festë e përbashkët, duke pasur parasysh se në RS nuk është shënuar kurrë më parë si një festë e entitetit, e aq më pak si ditë e shtetësisë, pasi RS nuk është një shtet.
