Presidenti serb ka shprehur përkrahjen për Listën Serbe në Kosovë, në zgjedhjet e ardhshme lokale. Aleksandër Vuçiç, tha se ata që nuk janë të bashkuar pas Listës Serbe, do ta kenë të vështirë ta fitojnë besimin e qytetarëve.
“Ne po shkojmë në zgjedhjet lokale në Kosovë, të bashkuar, sepse ata që nuk janë të bashkuar dhe nuk janë prapa Listës Serbe do ta kenë të vështirë të fitojnë besimin e njerëzve”, tha Vuçiç.
Vuçiç shtoi se besimi u fitua në bazë të unitetit dhe jo në bazë të rrënimit, si dhe se “ai ruan identitetin dhe mbijetesën tonë në Kosovë”.
Presidenti i Serbisë iu përgjigj pyetjes së gazetarëve se si i sheh bashkimin e partive shqiptare në komunitetet serbe para zgjedhjeve lokale në Kosovë, duke thënë se “është puna e tyre të bashkohen”.
Kur u pyet se si mund të ndihmohen serbët në Kosovë, Vuçiç tha se ishte e rëndësishme të ruhej populli serb në Kosovë.
“Duhet të flasim dhe shpresojmë që në Prishtinë të kuptojnë se është e nevojshme të flasim. Çdo gjë tjetër është humbje kohe dhe lënia e këtyre problemeve te brezat e ardhshëm”, tha ai.
