Presidenti i Serbisë, Aleksandar Vuçiç, përsëri ka njoftuar për një grusht shteti në atë vend, duke thënë se Rusia ka paralajmëruar udhëheqësinë e Serbisë për trazira të mëdha të pritshme, të cilat gjoja janë organizuar nga përfaqësues të vendeve perëndimore.
Ai e tha këtë para gazetarëve duke iu përgjigjur një pyetjeje në lidhje me përgatitjet e supozuara të Perëndimit për veprime në territorin e Serbisë me qëllim të kryerjes së një grushti shteti, dhe kjo është raportuar nga agjencia shtetërore ruse e lajmeve TASS.
“Sot kemi marrë informacion zyrtar nga Federata Ruse, i cili është transmetuar dhe sjellë përmes kanaleve zyrtare. Kemi marrë atë informacion, po merremi me të. Përgjegjëse është Agjencia e Sigurimit dhe Informimit (SOA serbe, red.), njerëzit e specializuar për këtë dhe në qeverinë e Serbisë dhe në të gjitha vendet e tjera po bëjnë punën e tyre,” tha Vuçiç.
Ai dërgoi një mesazh edhe organizatorëve të supozuar të grushtit të shtetit.
“Ata që ëndërrojnë se do të arrijnë diçka me forcë, nuk do ta arrijnë. Serbia po ecën përpara me pashmangshmëri, nuk mund ta ndalin. Dhe nuk do ta ndalin. Dhe asnjëherë më askush nuk do ta ndalojë atë. Ky është mesazhi im për të gjithë. Njerëzit nuk duhet të shqetësohen, nuk duhet të mërziten fare. Qetësisht, në shtëpinë e tyre, le të shohin nesër basketbollistët…”, përfundoi presidenti i Serbisë.
Më parë, mediat nën drejtimin e tij editorial kanë publikuar se përfaqësuesit e opozitës pro-perëndimore në Serbi janë të gatshëm të shfrytëzojnë protestat kundër minierës së litiumit të planifikuara për 10 gusht në Beograd për të pushtuar pallatin presidencial, për të eliminuar kreun e shtetit dhe për të nisur skenarin ukrainas. Në këtë mënyrë ata kanë përgatitur terrenin për njoftimin e Vuçiç për grusht shteti.
Në fakt, në të kaluarën, Vuçiç mund të mburret me shumë “grushte shteti”, dhe në periudhën nga pesë deri në 10 vitet e fundit, presidenti aktual i Serbisë i ka njoftuar ato kaq shumë herë ose ka vlerësuar ndonjë ngjarje si një grusht shteti saqë edhe gazetarët seriozë informativë në vend të lajmeve kanë shkruar satirë.
