Presidenti i Serbisë, Aleksandar Vuçiq, ka zhvilluar një takim me ministrin e jashtëm britanik, David Lammy, ku njëra nga temat ishte edhe Bosnja dhe Hercegovina (BiH).
Ai tha se Serbia dhe Britania e Madhe i kanë përmirësuar marrëdhëniet gjatë viteve të fundit, por se ende ka shumë për të bërë, veçanërisht në fushën e tregtisë.
“Pavarësisht dallimeve tona sa i përket Kosovës, ne e konsiderojmë dialogun si thelbësor dhe mendojmë se problemet duhet të zgjidhen përmes bisedimeve. Biseduam edhe për çështje rajonale, si dhe për situatën në Bosnjë dhe Hercegovinë. Serbia gjithmonë do ta respektojë Marrëveshjen e Dejtonit. Ne nuk dëshirojmë asnjë konflikt. Serbia dëshiron një rritje të shpejtë ekonomike dhe kjo është më e rëndësishmja për ne”, tha Vuçiq.
Ai shtoi se për Serbinë bashkëpunimi me Britaninë e Madhe është me rëndësi të madhe dhe shpreson që vizitat e ndërsjella do të jenë më të shpeshta.
“Prej Londrës gjithmonë do të kërkojmë mbështetje për paqe dhe stabilitet në rajon dhe për marrëdhënie sa më të afërta dhe më të mira ekonomike e tregtare”, përfundoi ai.
