Presidenti i Serbisë, Aleksandar Vuçiq, ka deklaruar se televizioni amerikan CNN po zhvillon një fushatë kundër tij, në të njëjtën mënyrë siç, sipas tij, veproi kundër ish-presidentit amerikan Donald Trump, raporton Anadolu Agency.
“Të dashur miqtë e mi nga Shtetet e Bashkuara të Amerikës, do ta kuptoni të gjithën. Shikoni çfarë thotë CNN – e vërteta është në anën e kundërt.”
“CNN po vepron njësoj ndaj meje si ndaj Trumpit”
“Do të shihni se ata bëjnë dhe thonë gjithçka kundër meje, ashtu siç bënin kundër presidentit amerikan Trump – dhe atëherë gjithçka do t’ju bëhet e qartë,” tha Vuçiq në një intervistë për Washington Examiner, duke iu përgjigjur pyetjes se çfarë do të donte që shikuesit amerikanë të dinin për Serbinë teksa ndjekin lajmet në rrjetet sociale.
I pyetur se çfarë mendon se duan protestuesit për momentin, Vuçiq u përgjigj se “kanë shkatërruar 186 traktorë”.
“Luftën më të madhe e patën mes veti. Askush nuk u është përgjigjur, nuk deshëm të arrestonim askënd. Në fund u desh të arrestonim 44 persona.
U mbajtën 13 prej tyre sepse ishin të dehur ose kishin shkaktuar dhunë,” theksoi presidenti i Serbisë.
“Jam i lumtur që nuk i shihni këto pamje në Evropë kur të tjerët organizojnë trazira”
Gazetarja e gazetës amerikane i tha Vuçiqit se asaj i dukej sikur protestuesit besonin se 15 marsi ishte “dita D”, ndaj Vuçiq u përgjigj se beson që do të ketë edhe disa “ditë D” të tjera.
“Do të ketë një tjetër ‘ditë D’, pastaj një të tretë, e më pas një të dhjetë,” tha ai.
“Dua të fokusohem, ashtu si edhe i gjithë vendi ynë, te ekonomia dhe e ardhmja jonë – që t’i zgjidhim të gjitha problemet në Kuvend, në mënyrë jashtëzakonisht demokratike, sepse besoj se kemi treguar sa shumë jemi përmbajtur nga përdorimi i çdo forme force.
Jam shumë i lumtur që nuk shihni pamje të tilla në Evropë kur të tjerët organizojnë trazira,” përfundoi Vuçiq.
