Ministri i Brendshëm serb Aleksandar Vulin tha se Serbia duhet të pranojë sa më shpejt që “nuk dëshiron” të jetë pjesë e Bashkimit Evropian (BE) dhe se “nuk ka vend atje, do të jetë më mirë”.
Ai shtoi se qëndrimi i Serbisë ndaj BE-së “nuk është çështje emocionesh por vendimesh racionale”.
“Çështja nuk është nëse ne duam të anëtarësohemi në BE, pyetja është nëse BE-ja do Serbinë. Duke gjykuar nga shantazhi i çmendur që po na ekspozojnë për të njohur Kosovën, për të shfuqizuar Republikën Srpska dhe për të vendosur sanksione ndaj Rusisë, ata nuk na duan”, tha Vulin.
Ai pohoi se BE-ja si aleancë është “një gjë e së kaluarës”, sepse me humbjen e pavarësisë politike, vendet e BE-së “u bënë territore, jo shtete”.
“Vendimi përfundimtar për pranimin e anëtarëve të rinj merret nga çdo parlament i çdo vendi të BE-së. A mendoni vërtet se kroatët do të votojnë për hyrjen e Serbisë në BE pa asnjë kusht tjetër? Modeli ‘dy Gjermania’ përmendet shpesh, por Gjermanët jetuan në të dyja Gjermanitë dhe Gjermania u nda sepse provokoi”, shtoi Vulin.
