Adoleshenti nga Bregu Perëndimor, i cili u mbajt për gjashtë muaj në burgun izraelit pa asnjë aktakuzë, ka ndërruar jetë në rrethana të paqarta dhe është bërë palestinezi i parë nën moshën 18 vjeç që ka vdekur në paraburgimin izraelit.
Walid Ahmad, 17 vjeç, ishte një nxënës i shëndetshëm i shkollës së mesme para se të arrestohej në shtator, nën dyshimin se kishte gjuajtur ushtarët me gurë, sipas familjes së tij.
Shërbimi izraelit i burgjeve nuk ka dhënë përgjigje për shkakun e vdekjes. Është konfirmuar vetëm se 17-vjeçari nga Bregu Perëndimor vdiq në burgun Megiddo – një objekt që më parë është akuzuar për keqtrajtime ndaj të burgosurve palestinezë.
Babai i tij, Khalid Ahmad, ka thënë se Walidi ishte adoleshent që e donte futbollin, para se të merrej nga shtëpia e tij në Bregun Perëndimor të pushtuar, gjatë një bastisjeje të forcave izraelite.
Gjashtë muaj më vonë, pas disa paraqitjeve të shkurtra në gjykatë pa caktim date për gjykim, Walid më 23 mars u rrëzua në oborrin e burgut dhe goditi kokën, pas së cilës ndërroi jetë, sipas zyrtarëve palestinezë që citojnë dëshmitë e bashkë të burgosurve.
Familja beson se Walid u sëmur nga dizenteria amebike për shkak të kushteve të këqija në burg – një infeksion që shkakton diarre, të vjella dhe marramendje, dhe që mund të jetë fatal nëse nuk trajtohet.
Autoriteti Palestinez, i mbështetur nga Perëndimi, ka thënë se ai është i mituri i parë palestinez që ka vdekur në paraburgim izraelit.
Sëmundja e lëkurës në burg
Walid kishte marrë pjesë të paktën katër herë në gjykatë përmes videokonference, thotë babai i tij. Secila seancë zgjaste vetëm rreth tre minuta. Seanca e radhës ishte caktuar për 21 prill.
Gjatë një seance në shkurt, katër muaj pas arrestimit të Walidit, babai i tij vërejti se gjendja shëndetësore e djalit ishte përkeqësuar.
“Trupi i tij ishte i dobësuar për shkak të kequshqyerjes në burgjet izraelite,” tha Ahmad për Associated Press, duke shtuar se i biri i kishte treguar se kishte marrë sëmundjen e lëkurës (shugu) por se ishte trajtuar.
“Mos u brengos për mua,” kujton babai fjalët e të birit.
Brutaliteti izraelit
Izraeli ka arrestuar mijëra palestinezë në Rripin e Gazës dhe në Bregun Perëndimor, duke i akuzuar për përfshirje në militantizëm.
Shumë prej tyre janë mbajtur me muaj të tërë pa aktakuzë ose gjykim në të ashtuquajturin “paraburgim administrativ”, që Izraeli e justifikon si një masë të nevojshme sigurie.
Të tjerë janë arrestuar nën dyshimin se kanë sulmuar ushtarë, por gjykimet ndaj tyre vazhdimisht shtyhen, ndërsa ushtria dhe shërbimet e sigurisë izraelite mbledhin dëshmi.
Emri i Walid Ahmad nuk duhet të harrohet – ai është simbol i tragjedisë së pafajësisë së burgosur dhe i brutalitetit të sistemit të paraburgimit izraelit.
