Shkencëtarët kanë zhvilluar një insulinë që reagon ndaj ndryshimeve të niveleve të sheqerit në gjak në kohë reale dhe mund të revolucionarizojë trajtimin e miliona njerëzve me diabet tip 1 në mbarë botën. Aktualisht, pacientët duhet t’i japin vetes insulinë sintetike deri në 10 herë në ditë për të mbijetuar.
Fluktuacioni i vazhdueshëm midis niveleve të larta dhe të ulëta të sheqerit në gjak mund të rezultojë në probleme shëndetësore afatshkurtra dhe afatgjata, dhe përpjekja për të mbajtur nivelet e qëndrueshme mund të ndikojë gjithashtu në shëndetin mendor, raporton The Guardian.
Shkencëtarët kanë gjetur një zgjidhje që ekspertët e quajnë më të afërt me një ilaç për diabetin tip 1 – insulina inteligjente që qëndron e qetë në trup dhe vepron vetëm kur është e nevojshme. Studiuesit në SHBA, Australi dhe Kinë kanë dizajnuar me sukses insulinë të reja që imitojnë reagimin natyror të trupit ndaj ndryshimit të niveleve të sheqerit në gjak dhe reagojnë menjëherë në kohë reale.
Insulinat standarde stabilizojnë nivelet e sheqerit në gjak kur hyjnë në trup, por pasi të përfundojnë punën e tyre, zakonisht nuk mund të ndihmojnë në fluktuacionet e ardhshme. Kjo do të thotë se pacientët shpesh duhet të injektojnë përsëri insulinë brenda disa orëve.
Insulinat e reja që reagojnë ndaj glukozës (GRI) bëhen aktive vetëm kur ka një sasi të caktuar të sheqerit në gjak për të parandaluar hipergliceminë (nivel i lartë i sheqerit në gjak). Ato bëhen sërish joaktive kur nivelet bien nën një pikë të caktuar, duke shmangur hipogliceminë (nivel i ulët i glukozës në gjak). Në të ardhmen, pacientëve mund t’u duhet insulinë vetëm një herë në javë, besojnë ekspertët.
Shkencëtarët që kanë zhvilluar insulinën inteligjente kanë marrë miliona dollarë fonde për të përshpejtuar zhvillimin.
Dr. Tim Heise, nënkryetari i komitetit këshillues shkencor për insulinat e reja, tha se insulina inteligjente mund të paralajmërojë një epokë të re në luftën kundër diabetit: “Edhe me insulinat moderne që janë aktualisht të disponueshme, njerëzit që jetojnë me diabet tip 1 duhet të bëjnë shumë përpjekje çdo ditë për të gjetur një ekuilibër të mirë midis kontrollit të pranueshëm të glikemisë nga njëra anë dhe shmangies së hipoglicemisë nga ana tjetër”.
“Insulinat që reagojnë ndaj glukozës – të ashtuquajturat insulina inteligjente konsiderohen si grali i shenjtë i insulinës sepse do të ishin më të afërta me një ilaç për diabetin tip 1,” shtoi ai.
Pothuajse 3 milionë paund janë ndarë për gjashtë projekte kërkimore që kanë zhvilluar lloje të ndryshme të insulinës inteligjente. Çdo projekt synon të rregullojë insulinën inteligjente për të vepruar më shpejt dhe me saktësi, duke lehtësuar pjesërisht ose tërësisht menaxhimin e diabetit tip 1 dhe ulur rrezikun e komplikacioneve afatgjata.
Insulina më të shpejta janë gjithashtu të nevojshme për të përmirësuar funksionin e pompave të insulinës dhe teknologjisë hibride me lak të mbyllur, një sistem që mbështetet në insulinën e ruajtur që reagon në kohë reale ndaj ndryshimit të nivelit të glukozës në gjak.
Dr. Elizabeth Robertson, drejtoresha e kërkimeve në Diabetes UK, tha se projektet kanë potencialin për të revolucionarizuar trajtimin e diabetit tip 1.
