Zëdhënësja e Shtëpisë së Bardhë, Karoline Leavitt, njoftoi se administrata e Trump-it do të ndryshojë plotësisht praktikën që ka qenë në fuqi për dekada të tëra.
Siç deklaroi Leavitt, nga tani e tutje, Shtëpia e Bardhë do të vendosë se cilave grupe gazetarësh do t’u lejohet hyrja në hapësira të caktuara, si Zyra Ovale dhe avioni presidencial.
Gjatë një konference për shtyp të martën, Leavitt tha se ky hap i ri do të sjellë një qasje edhe më të madhe për popullin amerikan.
“Ne duam që më shumë media të kenë mundësinë të marrin pjesë në konferencat për shtyp dhe të raportojnë nga afër për arritjet e papara të administratës amerikane”, tha zëdhënësja.
Ajo gjithashtu theksoi se praktika për dekada me radhë ka qenë ndryshe.
“Siç e dini të gjithë, për dekada me radhë, një grup gazetarësh me bazë në Uashington, të cilët vepronin nën Shoqatën e Korrespondentëve të Shtëpisë së Bardhë, kanë diktuar se cilët gazetarë lejoheshin të bënin pyetje për presidentin e SHBA-së në këto ambiente. Kjo nuk do të jetë më e vlefshme”, deklaroi ajo.
Leavitt gjithashtu nënvizoi se është krenare për këtë vendim.
“Jam krenare që mund të njoftoj se do t’u japim më shumë fuqi njerëzve që lexojnë mediat tuaja, shikojnë emisionet tuaja televizive dhe dëgjojnë stacionet tuaja radiofonike”, përfundoi Leavitt.
