Presidenti ukrainas Volodymyr Zelensky tha se ishte e rëndësishme që takimi i tij me presidentin e SHBA-së, Donald Trump të bëhet para bisedimeve të Trump me presidentin rus Vladimir Putin, sepse në të kundërtën, siç tha ai, do të ishte një dialog “për Ukrainën pa Ukrainën”.
Zelensky tha në një intervistë për Reuters se ai beson se kjo, para së gjithash, do të ishte e padrejtë për Ukrainën, por gjithashtu se nuk do të ofronte perspektiva reale për përfundimin e luftës dhe as për një armëpushim. “Është e rëndësishme që partnerët të flasin fillimisht dhe vetëm më pas të flasin me armikun. Unë mendoj se ne duhet të veprojmë në atë kontekst,” tha Zelensky.
Ai theksoi se në SHBA, Evropë dhe Ukrainë po flitet se Trump tashmë ka rënë dakord për gjithçka me Putinin dhe se Ukraina do të informohet për këtë vetëm më vonë.
“Kjo nuk do të ndodhë, unë jam i sigurt për këtë. Ne duhet të kuptojmë se Ukraina po shkon në negociata, jo në ultimatumet e Rusisë”, theksoi Zelensky.
Sipas tij, ultimatume të tilla do të bëhen kërkesa jo vetëm për Ukrainën, por edhe për të gjithë botën e lirë dhe “kjo nuk mund të lejohet”.
Zelensky deklaroi se kontaktet mes ekipit të tij dhe ekipit të Trump ndodhin çdo ditë.
Trump tha të premten se mund të zhvillojë takimin e tij të parë me Zelensky javën e ardhshme dhe se ai gjithashtu ka planifikuar të bisedojë me Putinin për luftën në Ukrainë./abcnews.al
