Ish-shefi i shërbimit të inteligjencës ushtarake izraelite shprehu të enjten dyshime mbi suksesin e planit të presidentit amerikan Donald Trump për të marrë nën kontroll Rripin e Gazës dhe për të zhvendosur palestinezët në zona të tjera.
“Një plan jashtëzakonisht i favorshëm u është paraqitur izraelitëve këtu dhe shpresoj që të realizohet. Megjithatë, mendoj se shanset për këtë janë shumë të vogla dhe përfshin gjithashtu edhe rreziqe,” tha Amos Yadlin, i cili drejtoi shërbimin e inteligjencës ushtarake të Izraelit nga viti 2006 deri në vitin 2010, për radion lokale 103 FM.
Të martën, gjatë një konference për shtyp me kryeministrin izraelit Benjamin Netanyahu, presidenti amerikan deklaroi se SHBA do të “marrë në dorë” Gazën dhe do të zhvendosë palestinezët në zona të tjera si pjesë e një plani të jashtëzakonshëm rindërtimi, për të cilin pretendoi se mund ta shndërrojë enklavën në “Rivierën e Lindjes së Mesme”.
Ky propozim u prit me dënime të gjera nga palestinezët, vendet arabe dhe shumë shtete të tjera në mbarë botën, duke përfshirë Kanadanë, Francën, Gjermaninë dhe Mbretërinë e Bashkuar.
Yadlin deklaroi se Trump ka theksuar vazhdimisht rëndësinë e kthimit të robërve izraelitë që mbahen nga grupet palestineze në Gaza.
“Mendoj se ai (Trump) i dha Netanyahut një mjet për të kaluar në fazën tjetër të marrëveshjes për shkëmbimin e robërve. Trump, në thelb, ka punuar për të stabilizuar qeverinë izraelite, e cila rrezikonte të rrëzohej për shkak të (ministrit të financave Bezalel) Smotrich,” tha Yadlin.
Smotrich kishte kërcënuar të rrëzonte qeverinë izraelite nëse lufta në Rripin e Gazës nuk do të vazhdonte.
Sipas Yadlin, Trump i ka “shitur iluzione” Smotrich-it për zhvendosjen e popullsisë së Gazës, me qëllim që të mundësohej kalimi në fazën tjetër të armëpushimit në këtë zonë.
Megjithatë, ish-shefi i inteligjencës mbështet idenë e dëbimit të palestinezëve nga Gaza, madje edhe “larg Lindjes së Mesme”, por theksoi se shanset për suksesin e planit të Trump-it janë shumë të kufizuara.
Trump ka sugjeruar disa herë që refugjatët palestinezë nga Gaza duhet të pranohen nga vendet arabe fqinje, si Egjipti dhe Jordania, por ky propozim është refuzuar si nga këto vende ashtu edhe nga liderët palestinezë.
Propozimi i tij për zhvendosjen e palestinezëve nga Gaza erdhi pasi më 19 janar hyri në fuqi një marrëveshje për armëpushim në enklavë, duke ndërprerë përkohësisht luftën izraelite, e cila kishte vrarë mbi 47,500 njerëz, plagosur më shumë se 111,000 dhe lënë enklavën të shkatërruar.
