Në takim u theksua se u diskutuan përgatitjet e përbashkëta ushtarake për skenarët e përshkallëzimit të tensionit në rajon
Njoftohet se komandantët e lartë të ushtrisë izraelite dhe amerikane kanë mbajtur një takim “strategjiko-operativ”, ku kanë diskutuar çështjet e përbashkëta të sigurisë, transmeton Anadolu Agency (AA).
Në deklaratën me shkrim të ushtrisë izraelite, thuhet se në takimin e zhvilluar me Komandën Qendrore të SHBA-së, janë diskutuar problemet e sigurisë me të cilat përballen dy ushtritë.
Thuhet se në takimin treditor “strategjiko-operativ” morën pjesë Zv/komandanti i Komandës Qendrore të SHBA-së, Admirali James Malloy, gjenerali Gregory Guillot nga Komanda e Forcave Ajrore të Komandës Qendrore të SHBA-së, si dhe komandanti i Flotës së Pestë të SHBA-së, Admirali Brad Cooper.
Në deklaratë thuhet se shefi i Shtabit të Përgjithshëm të Izraelit, gjenerali Aviv Kohavi, është takuar me delegacionin e lartë ushtarak amerikan për të vlerësuar situatën dhe analizuar problemet rajonale.
Në takim u theksua se u diskutuan përgatitjet e përbashkëta ushtarake për skenarët e përshkallëzimit të tensionit në rajon.
Gjithashtu njoftohet se delegacionet ushtarake kanë vizituar edhe kufirin libanez dhe kanë shqyrtuar çështjet strategjike dhe të inteligjencës.
