Bashkimi Evropian i ka paguar Rusisë për energjinë një shumë me të cilën mund të bliheshin 2400 avionë të rinj luftarakë F-35 që nga fillimi i pushtimit të Ukrainës, tha në Parlamentin Evropian komisioneri i Komisionit Evropian për Energjinë, Dan Jorgensen.
Nafta ruse sot përfaqëson vetëm tre për qind të totalit të importit në BE, që është një rënie e ndjeshme krahasuar me nivelet para luftës, kur kjo përqindje ishte 25 për qind, tha komisioneri në Strasburg gjatë debatit mbi përshpejtimin e braktisjes së importeve të energjisë nga Rusia.
Ndërkohë, importi i gazit nga Rusia është zvogëluar nga 45 për qind në vitin 2019 në 19 për qind vitin e kaluar, tha politikani danez, duke njoftuar një “rënie të mëtejshme të konsiderueshme” të importit nga Rusia dhe eliminimin gradual të tij.
Jorgensen foli për këtë temë disa ditë pasi presidenti amerikan Donald Trump kritikoi BE-në për blerjen e energjisë nga Moska.
“E dini çfarë më shqetëson tek Evropa? Ata i kanë dhënë Rusisë shumë më tepër para duke blerë naftën e tyre sesa kanë investuar në Ukrainë. Pra, ata po i paguajnë shuma të mëdha Rusisë, ndërsa ne kemi dhënë 350 miliardë dollarë për Ukrainën,” tha republikani.
Edhe pse pretendimi i Trump për shumën e ndihmës së SHBA-ve është hedhur poshtë si i ekzagjeruar, debati në Parlamentin Evropian konfirmoi vlerësimin se BE-ja, edhe pas fillimit të pushtimit të Ukrainës, i ka paguar një shumë të lartë Moskës për energjinë ruse.
“Po mbushim indirekt arkën e Putinit me para”
Komisioneri tha në Strasburg se politikat evropiane kanë qenë “në njërën anë të suksesshme” sepse BE-ja arriti të ndryshojë shpejt peizazhin e saj energjetik, por nga ana tjetër edhe të pasuksesshme, pasi ende importon shumë gaz nga Rusia.
“Po mbushim indirekt arkën e luftës së Putinit me para,” tha ai.
Që nga shkurti i vitit 2022, kur nisi agresioni i saj, shtetet evropiane i kanë paguar Rusisë një shumë “të barabartë me koston e 2400 avionëve të rinj luftarakë F-35”, tha Jorgensen.
Lajmi i mirë, theksoi ky politikan socialdemokrat, është se BE-ja ka opsione për ta ndryshuar këtë situatë, dhe masat që blloku duhet të ndërmarrë për të reduktuar varësinë nga Rusia janë të njëjta me ato që duhen për të dekarbonizuar ekonominë e tij.
“Është e gabuar të thuhet se gazi dhe karburantet fosile janë burimet më të lira të energjisë – kjo thjesht nuk është e vërtetë,” shtoi ai.
Jorgensen tha se BE-ja kursen para çdo vit duke futur burime të reja të energjisë së rinovueshme dhe duke forcuar efiçencën energjetike: “Energjia më e lirë është ajo që nuk e përdorim.”
Ai theksoi se BE-ja vitin e kaluar vendosi burime të rinovueshme të energjisë me një kapacitet prej 78 gigavatësh dhe se viti 2024 ishte viti i parë kur centralet diellore prodhuan më shumë energji sesa qymyri.
“Nuk do të ketë ngadalësim të politikave të gjelbra në Evropë, përkundrazi,” tha ai.
Përveç burimeve të rinovueshme, BE-ja do të arrijë pavarësinë nga Rusia duke rritur efiçencën energjetike dhe duke diversifikuar burimet e saj, përfundoi komisioneri danez.
